"Jurnalistlərin əməyi qeyri-adi əməkdir, olduqca böyük zəhmətli
əməkdir, çox şeylərin göstərilməsi, hətta cəsurluq, hünər, fədakarlıq tələb
edən əməkdir, öz peşəsinə vurğunluq tələb edən sənətdir.

Ümummilli lider Heydər ƏLİYEV





        Azərbaycan ictimai fikir tarixində mühüm hadisə kimi milli mətbuatımızın
yaranmasından 139 il keçir. Böyük mütəfəkkir, ziyalı Həsən bəy Zərdabinin
təşəbbüsü ilə nəşrə başlayan "Əkinçi" qəzeti milli mədəniyyətimizdə
önəmli yerlərdən birini tutdu, milli mətbuatımızın təməli qoyuldu.
"Əkinçi" qəzeti uzun və şərəfli bir yol keçmişdir. Bu qəzet təkcə
Azərbaycan milli mətbuatının yaranma tarixi deyil, milli şüurumuzun
oyanmasının, azadlıq mücadiləmizin, mədəniyyətin, milli əqidənin oyanışının,
nadanlıq və cəhalətə qarşı mübarizə beşiyi başında şanlı tariximizdir.
Keçmişimizin şanlı ənənələrini yaşadan "Əkinçi" qəzetinin tarixi
əhəmiyyətini layiqincə qiymətləndirmək lazımdır. O zaman Azərbaycan dilində
kitab və qəzet nəşr etmək çox çətin bir məsələ idi. "Əkinçi"
iqtisadiyyatda, ictimai münasibətlərdə, maarif, mədəniyyət, ədəbiyyat,
ümumiyyətlə həyatımızın bütün sahələrində yeniləşmənin və tənzimlənmənin
tərəfdarı olmuşdur. "Əkinçi" qəzetinin tarixi ənənələrini yaşatmaq
yolunda son illərdə Azərbaycan hökumətinin apardığı işlər təqdirə layiqdir.

Azərbaycan Respublikası Konstitusiyasının 47-ci maddəsinə əsasən hər
kəsin fikir və söz azadlığı vardır. Konstitusiyanın 50-ci maddəsinə əsasən isə
hər kəsin istədiyi məlumatı qanuni yolla axtarmaq, əldə etmək, ötürmək,
hazırlamaq və yaymaq hüququ vardır. Beləliklə də Kütləvi İnformasiya
Vasitələrinə tam azadlıq verilmişdir. Müstəqil mətbuatın sərbəst fəaliyyəti və
curnalistlərin təhlükəsizliyinin təmin olunması, maddi-texniki təchizatın daha
da möhkəmlənməsi naminə "Kütləvi İnformasiya Vasitələri haqqında",
"Dövlət sirri haqqında", "İnformasiya, informasiyalaşdırma və
informasiyanın mühafizəsi haqqında", "Müəlliflik hüququ və əlaqəli hüquqlar
haqqında", "Teleradio yayımı haqqında", "Azərbaycan Respublikasında
söz, fikir və mətbuat azadlığının təmin edilməsi sahəsində  əlavə 
tədbiriər  haqqında"
qanunlar, Azərbaycan Respublikasının Prezidenti, ümummilli liderimiz mərhum
Heydər Əliyevin verdiyi Fərman və digər Sərəncamlar ictimaiyyət tərəfindən
rəğbətlə qarşılanmışdır.

Ümummilli liderimiz Heydər Əliyevin layiqli davamçısı, siyasi kursunu
dönmədən irəliyə doğru aparan möhtərəm Prezidentimiz İlham Əliyev də mətbuatın cəmiyyətimizdə
oynadığı əsaslı rolu qiymətləndirir, jurnalist əməyinə yüksək qiymət verir.

«Xocalının səsi» qəzeti respublikamızda baş verən siyasi hadisələrə də
həmişə öz münasibətini bildirmiş, 2002-ci ildə keçirilən referendum, Prezident
seçkiləri, Ümummilli liderimiz Heydər Əliyevin vəfatı münasibətilə xüsusi
buraxılışlarını nəşr etmişdir. Xocalı faciəsinin ildönümləri münasibəti ilə hər
il nəşr olunaraq respublika səviyyəsində pulsuz yayımlanır.


«Xocalının səsi»